Делегација на кинескиот град Далиан во работна посета на Охрид

Охрид, 27 јануари 2015 (МИА) – Делегација од збратимениот кинески град Далиан престојува во работна посета на општина Охрид. Во рамки на посетата за утре е предвидено претставници на двете општини да парафираат Меморандум за соработка меѓу претставници од Секторот за туризам и локален економски развој од Охрид  и на Бирото за туризам од Далиан.

Во текот на ноември минатата година делегација на кинескиот град Далиан го посети Охрид, кога беа предложени и неколку области за потенцијална соработка во иднина, со акцент врз можностите за соработка на полето на културата, образованието, посебно во сферата на информатичките технологии оттаму една од трите главни стопански гранки на Далиан е токму информатичката технологија.

Градот Далиан е еден од најразвиените градови во Кина, лоциран во најбогатата кинеска провинција Манџурија. Пристаништето во Далијан е на десетто место според обртот, а неговиот капацитет за прием на бродови е на дваесетто место во светот. Регионот на градот Далиан е и еден од главните туристички центри на Кина, кој минатата година го посетиле 53 милиони туристи од кои 11 милиони странци. Во градот живеат над 10 милиони жители и годишен БДП од 70 милијарди долари. Далиан е и образовен центар со 31 универзитет.