Осмомартовски честитики од најмладите за највозрасните кумановки

Куманово, 5 март 2015 (МИА) - Децата од јавната општинска установа „Ангел Шајче“ изработија осмомартовски честитики кои денеска ги подарија на корисничките на услугите на Домот за стари лица „Зафир Сајто“. На овој начин им го честитаа престојниот празник и со мала приредба ги изненадија корисничките на домот за стари лица.
 
- Ова е традиционална активност која се спроведува помеѓу двете установи, изјави денеска директорката на градинката Марина Алесковска.
 
На овој начин, објасни Алесковска, преку практичен пример ги учиме најмладите како треба да се почитуваат повозрасните и како треба да им се посвети внимание.
 
Социјалниот работник од Домот за стари лица, Росица Митиќ, информираше дека во домот има 96 кориснички на услугите од вкупно 150 корисници.
 
- Ова се убави моменти за нашите кориснички. Преку најмладите го добиваат посакуваното внимание, вели Митиќ.
 
Домот за стари лица „Зафир Сајто“, неодамна го реновираше геријатриското одделение со сопствени средства во вредност од 1,8 милиони денари, со што се зголеми квалитетот на услугите кои ги нуди установата за корисниците. Надлежните од установата тогаш најавија дека ќе одвојат дополнителни средства за дополнителна реконструкција која ќе следи во тековната година.
 
Домот за стари згрижува корисници од подрачјето на североистокот и Скопје. Стручен тим се грижи за здравјето на корисниците, но и постојано се води сметка за одржување и квалитетен социјален живот.