Проширена кривичната пријава на СДСМ за неовластено прислушување

Скопје, 5 март 2015 (МИА) - До Основното јавно обвинителство денеска се доставени дополнителни материјали за проширување на поднесената кривична пријава од страна на СДСМ за неовластено прислушување.

Материјалите ги доставија заменик претседателката и секретарот на СДСМ Радмила Шекеринска и Оливер Спасовски, носителот на столбот Партнерства за демократска Македонија Стево Пендаровски, претседателот на НСДП Тито Петковски, како и поранешниот претседател на ЛДП и градоначалник на Центар Андреј Жерновски.

Во прилог на поднесената проширена кривична пријава се и тонски записи и стенограми кои ги објави претседателот на СДСМ Зоран Заев.

Според Пендаровски, доказите кои се приложени со пријавата се однесуваат на период од четири години. 

- Немало причина да не прислушуваат, освен политичка мотивација, изјави Пендаровски, изјазувајќи надеж дека ќе биде постапено по проширената кривична пријава. За првичната пријава, како што рече, Обвинителството до овој момент не постапува, а беше поднесена пред десетина дена.