Студенти од УИТ „Св. Апостол Павле“ од Охрид ќе решават проблеми на НАСА

Охрид, 27 март 2015 (МИА) – Студентите на Универзитетот за информатички науки и технологии „Св. Апостол Павле“ во Охрид на 10 и 11 април ќе можат да ги покажат своите програмски вештини и иновативното размислување, во рамки на натпреварот во знаења „NASA Space Apps Challenge“.

Дводневниот настан е замислен да ги мотивира младите да ги употребат сите свои ресурси за создавање иновативни решенија за проблеми со кои се соочува вселенската агенција НАСА.

Организаторите на настанот очекуваат во натпреварот на знаења учество на најдобрите програмери, графички дизајнери и хардверски ентузијасти.

Настанот што е инициран од „New mans Buisiness Accelerator“ има за цел поттикнување активизам кај младите, но истовремено и добра можност за промоција и афирмација на градот Охрид.

- Целта е да докажеме дека нашата држава и град има потенцијал за решавање на проблеми кои го засегаат светот. Наша заложба е овој настан да биде организиран за да обезбеди пријатна атмосфера за создавање на идеи и решенија на младите ентузијасти, кои ќе одговорат на проблемите со кои се соочува вселенската агенција НАСА, потенцираат организаторите.