Проект за изучување на францускиот јазик во кумановското ОУ „Браќа Миладиновци“

Куманово, 20 април 2015 (МИА) - Учениците од петто одделение од основното училиште „Браќа Миладиновци“ од Куманово ќе го изучуваат францускиот јазик преку проект што се спроведува во соработка со Министерството за образование и наука.

Тие ќе го учат јазикот преку приредби, музика, филмови и спорт по што во шесто одделение и официјално ќе можат да го изучуваат како втор странски јазик.

Координаторката на проектот Зорица Пиграноска информираше дека по спроведената анкета 78 проценти од родителите се изјасниле дека сакаат нивните деца да следат ваков тип на настава.

- Многу сме задоволни и верувам дека проектот ќе успее. Тој ќе се спроведува до крајот на учебната година, изјави Пирганоска.

Целта на проектот е да го популаризира изучувањето на францускиот јазик.

- Ова училиште е како матица со оглед на тоа дека овде веќе интензивно се изучува францускииот јазик, но сметаме дека има простор за поголема популаризација и вклучување на поголем број ученици. Се работи за проект за сензибилизација на францускиот јазик, истакна Марија Николова, одговорна во МОН за Франкофонијата.

Освен во ова училиште проектот ќе се спроведува и во кумановското основно училиште „Кочо Рацин“ во Куманово, а на ниво на државата на овој начин францускиот јазик го изучуваат ученици од повеќе скопски општини и ученици од другите градови.