Пеесетина европратеници ја потпишаа Декларацијата за "Осуда на недемократскиот обид за преземање на власта во Македонија"

Стразбур, 24 април 2015 (МИА) - Во Парламентарното собрание на Советот на Европа досега 49 пратеници од 21 европска земја и 4-те политички групи ја потпишале писмената декларација за "Осуда на недемократскиот обид за преземање на власта во Македонија".

Во декларацијата, чија содржина и потписници се објавени на веб страницата на ПС на СЕ, се изразува загриженост за последниот развој на политичката состојба, особено на, како што се вели, неодговорното однесување на опозицијата.

- Ние ја поддржуваме итеграцијата на Македонија во Европската унија и во НАТО и сметаме дека евроатланската интеграција е заедничка одговорност и на Владата и на опозициските партии. Сметаме дека македонските парламентарни избори беа слободни и фер, според извештаите на ОБСЕ и изјавата на Парламентарното собрание на Советот на Европа, се вели во Декларацијата.

Во неа потписниците ги осудуваат, како што се наведува, заканите од претседателот на СДСМ Зоран Заев упатени до премиерот Никола Груевски и вмешаноста на странските тајни служби во нелегалното прислушување на телефонските разговори на највисоките политички претставници во Македонија.

- Сметаме дека само политичките аргументи и програми базирани на гласањето на граѓаните се демократски начин да се добијат изборите, се посочува во Декларацијата.

Потписниците бараат обновување на политичкиот дијалог и одговорно однесување на опозицијата, вклучително и враќањето на опозициските пратеници во Парламентот, како и слободни и независни судски процеси, спроведени по највисоки европски стандарди во транспарентна постапка.

- Ја подвлекуваме важноста на политичкиот дијалог во разрешувањето на конфликтите и апелираме на одговорна политичка опозиција во Македонија која ќе ги почитува демократските правила во политичкиот систем.