Атина, 27 април 2015 (МИА) - Од состанокот меѓу Коѕиас и Нимиц, очекувано, не произлегоа никакви новости, со оглед на тоа што ситуацијата во Грција и Македонија во моментов не дозволува да се материјализираат иницијативи кои ќе создадат вистинска надеж за надминување на ќорсокакот во кој се наоѓа прашањето за името.
Ова денеска го пишува грчкиот весник „Етнос“ во кусиот коментар за средбата на грчкиот министер за надворешни работи Никос Коѕиас со медијаторот Метју Нимиц, која се одржа во петокот во Њујорк.
Шефот на грчката дипломатија по минатонеделните средби со Нимиц и генералниот секретар на ОН Бан Ки Мун рече дека разговарале за текот на преговорите за прашањето за името, а брифирал и за разговорите во врска со мерките за градење доверба.
- Во Будимпешта, каде што бев пред две недели, разменивме листи со точки за мерките за градење доверба, и, како што видовме во изминатите десет дена, има совпаѓање во ставовите за некои точки кои би можеле да послужат како појдовна точка за дијалог, информира Коѕиас во врска со средбата со македонскиот министер за надворешни работи Никола Попоски во Унгарија.