Активности за изградба на локален пат во кривопаланечка Конопница

Крива Паланка, 22 мај 2015 (МИА) - Локалната самоуправа на Крива Паланка започна со градежни активности околу изградба на локалниот пат во село Конопница до место викано „Спас“.

- Со почетокот на градежната сезона започнавме со активности во нашата општина. Моментно користиме средства од Светската банка и започнавме со градежни работи на продолжение  од постојниот пат во Конопница до местото викано Спас, кој води до гробиштата. Со овој проект ќе бидат асфалтирани 330 метри, информира градоначалникот на Крива Паланка, Арсенчо Алексовски.   
 
Изградбата на овој дел од патот, додаде, е во рамки на проектот финансиран од Светска банка и Јавното претпријатие за државни патишта со вкупна вредност од околу 38.000 евра.  
 
- Бидејќи за овој дел имаме изработено проект и обезбедена е градежна дозвола сега ќе бидат асфалтирани 330 метри, додека останатите 300 метри од патот ќе бидат оспособени за сообраќање на возила, но ќе остане земјен пат. Ова беше и дел од моите предизборни ветувања и веќе се остварува, а работиме и на изнаоѓање средства за асфалтирање на останатиот дел од патот, рече Алексовски.      
 
Изведувач на градежните работи е градежната фирма  АД „Бетон“  од Скопје, а надзор ГИМ Скопје.