Хавана 27 ноември 2016 (МИА) – На Куба почна 9-дневна жалост по повод смртта на револуционерниот лидер Фидел Кастро.
На Универзитетот во Хавана каде тој студирал стотици студенти извикуваа „Јас сум Фидел“, продажбата на алкохол е забранета, знамињата се на половина копје и откажани се сите концерти.
Масовните митинзи во чест на Кастро кој почина во петокот на 90-годишна возраст би требало да се одржат на Плоштадот на револуцијата во Хавана како и во градот Сантијаго на исток во државата.
Весниците во 11-милионска Куба се печатени со црно мастило во знак на жалост за Кастро наместо црвеното кое е обележје на „Гренма“, официјалниот дневен весник на КП, и синото мастило на весникот на комунистичката младина Бунтовна младина.
Според западни медиуми, не е регистрирано засилено присуство на армијата или полицијата.