Во Струмица наскоро ќе биде отворен ургентен центар

Струмица, 25 октомври (МИА) - На првиот кат од новиот болнички крак во Струмица наскоро ќе биде отворен ургентен центар. Градежниот дел и опремувањето на центарот деновиве беа целосно завршени.

- Еден од приоритетите од долгорочната инвестициска програма на Општина Струмица е комплетно заокружување на новото болничко крило, за чија изградба досега се потрошени над 3,5 милиони евра. Само лани и годинава за оваа намена од општинската буџетска каса беа издвоени околу 15 милиони денари, а за целосно опремување на новиот поликлинички блок се потребни најмалку уште три пати повеќе средства, кои се надевам дека ќе бидат обезбедени од европските фондови, изјави за МИА градоначалникот на Општина Струмица Зоран Заев.

Во новиот болнички крак, на површина од околу 6.000 квадратни метри, покрај ургентниот центар, ќе бидат сместени и повеќе специјалистички одделенија, кои со планираното екипирање на струмичкиот Медицински центар со супспецијалистички медицински кадар, како и со набавка на современа апаратура и инструменти ќе обезбедуваат квалитетна секундарна и терцијална здравствена заштита не само за пациентите од Струмичкиот, туку и од другите региони во југоисточниот дел на Републикава.