Македонија зафатена од повеќе пожари

Скопје, 27 јуни (МИА) - Во атарот на скопското село Катланово, како и во околните населени места гори поголема површина сува трева и шума.

Елена Поцевска од Центарот за управување со кризи информира дека во Катланово е евидентирана опожарена корисна површина од 60 хектари. При пожарот една викендичка е целосно изгорена, а две се опожарени. Екипите на противпожарните бригади со осум возила и 19 пожарникари се уште се на терен, а пожарот е ставен под контрола, но се уште не е локализиран.

Во кумановското село Бајловце пожарот зафатил површина од околу 20 хектари ниска трева, не е причинета материјална штета, а огнената стихија навреме е локализирана.

Шумски пожар на трева и ниска шумска вегетација беснее од Криволак кон Штип. Од противпожарните екипи на Неготино ангажирани се екипи и на Армијата на Република Македонија. Противпожарните екипи потврдуват дека станува збор за пожар со поголеми размери.

Во кривопаланечко евидентирани се пожари во село Петровница и Одрено на површина од два хектари ниска вегетација, при што е причинета мала материјална штета, а пожарот е навреме локализиран.

Во кочанско пријавени се пожари во Зрновце и околината на површина меѓу 30 и 50 хектари на лозје  и посеви. Благодарение на противпожарните екипи и екипите на МВР, како и на локалното население пожарот навреме е локализиран, вели Елена Поцевска од Центарот за управување со кризи.