Џакарта, 1 октомври (МИА) - Силен земјотрес со интензитет од седум степени според Рихтер утрово е регистриран на островот Суматра, кој вчера исто така беше потресен од уште еден посилен потрес од 7,6 степени, соопшти индонезискиот геофизички институт.
Епицентарот на новиот потрес се наоѓал во провинцијата Џамби, на 10 километри длабочина и на околу 46 километри југоисточно од Сунгаипенух. Засега нема информации за жртви.
Индонезискиот министер за здравство Сити Супари изјави дека во вчерашниот земјотрес на островот најверојатно загинале илјадници луѓе.
- Можно е да има илјадници жртви, ако се суди според огромните урнатини. Се уште не знаеме колку се, истакна Супари во Џакарта.
Се претпоставува дека илјадници луѓе се наоѓаат затрупани под урнатините на зградите во градот Паданг и неговата околина. Жители на градот и спасувачки екипи учествуваат во пронаоѓање на преживеани, но нивната работа е отежната поради дождот и недостаток на техника за расчистување на остатоците.