Џакарта, 1 октомври (МИА) - Билансот за загинатите во вчерашниот земјотрес на индонезискиот остров Суматра, достигна 467 лица, а ранети се повеќе од 420 лица.
Според информациите на кризниот центар при Министерството за социјални грижи најтешко погоден е главниот град на провинцијата Западна Суматра, Паданг, каде се регистрирани 376 смртни случаи. Останатите жртви се од четири други окрузи на провинцијата.
Илјадници лица се затрупани под урнатините на зградите, соопшти Националната агенција за природни катастрофи.
Индонезискиот министер за здравство Сити Фадилах Супари изјави дека бројот на жртвите може да достигне и над илјада лица.
Земјотресот со интензитет од 7,6 степени според Рихтеровата скала го погоди Суматра вчера, а изутринава беше регистриран уште еден потрес со јачина од 6,8 степени, на околу 150 километри јужно од Паданг.