Берлин, 19 октомври (МИА) - САД и Русија се едногласни дека треба да се разгледаат понатамошни мерки против Иран, доколку не се постигне дипломатско решение за неговата нуклеарна програма, изјави државниот секретар Хилари Клинтон во интервју за руското издание на списанието „Њузвик“, пренесено во германскиот весник „Велт“.
Клинтон не успеа да добие конкретни ангажмани од Москва за построги санкции, но посочува дека има согласност со Кремљ како да се дејствува.
- Се договоривме дипломатијата да биде приоритет за Иран. Ако не постигнеме успех, меѓутоа, ќе разгледаме други мерки, рече Клинтон. Таа ги оцени разговорите со руските лидери како многу конструктивни.
Клинтон го оцени како позитивен фактот дека Русија не ги исполнила плановите за испорака на високоразвиени противвоздушни ракетни системи С-300 на Иран.
- Досега не доставиле никакви ракетни системи на Иран. Тоа за нас е добар знак, рече таа.
Клинтон потврди дека Вашингтон е подготвен да соработува со Москва за противракетната одбрана, откако претседателот Барак Обама го поништи планот на својот претходник Џорџ Буш за противоракетниот штит во Источна Европа.