Кабул, 19 ноември (МИА) - Хамид Карзаи денеска даде заклетва за вториот мандат како претседател на Авганистан, соопштија светските агенции.
Карзаи се заколна пред претседателот на Врховниот суд Абдул Салам Азими, во присуство на стотици гости и странски делегации од над 40 земји. Меѓу нив беа пакистанскиот претседател Асиф Али Зардари, државниот секретар на САД Хилари Клинтон и министрите за надворешни работи на Русија и Велика Британија Сергеј Лавров и Дејвид Милибанд.
Во својот говор по полагањето на заклетвата Карзаи соопшти дека авганистанската армија треба да ја преземе водечката улога во борбата против бунтовниците.
Одговарајќи на повиците на САД и Европа за елиминирање на неконтролираната корупција во земјата, претседателот изјави дека следната негова Влада ќе се состои од експерти и компетентни луѓе.
-Корумпираните треба да бидат изведени пред судот и осудени, подвлече тој, истакнувајќи дека "таквите луѓе се опасни непријатели на државата".
Тој презеде ангажман и да се справи со нелегалниот извоз на наркотици од Авганистан.