Уапсена поранешната јужнокорејска премиерка Хан Мјунг-сук

Сеул, 18 декември (МИА) - Поранешната јужнокорејска премиерка Хан Мјунг-сук е уапсена денеска под обвинение за примање мито во висина од 50.000 долари.

Хан, која е првата жена премиер во историјата на Јужна Кореја, е уаспена откако претходно двапти не се појавила на распит пред Централниот регионален суд во Сеул, иако била уредно поканета.

Обвинителниот акт ја товари 65-годошната Хан дека додека ја извршувала премиерската функција, земала поткуп од 50.000 долари со цел да го назначи бизнисменот Квак Јонг-вук за извршен дирекор на фирма-ќерка на електоренергетската корпорација на Јужна Кореја. Хан ги отфрла ваквите обвинувања.

Хан беше премиер на Јужна Кореја од април 2006 до март 2007 година, во време кога шеф на државата беше Ро Му-хјун, кој се самоуби во мај годинава, откако беше обвинет за примање поткуп во износ од шест милиони долари.