Техеран, 9 февруари (МИА) - Иран денеска го започна процесот на збогатување ураниум за 20 проценти, јави иранската телевизија Ал Алам.
Исламската република „започна да збогатува ураниум за 20 проценти во присуство на инспектори од Меѓународната агенција за атомска енергија (ММАЕ) во нуклеарниот комплекс Натанз“, во централниот дел на земјата, соопшти за телевизијата неименуван извор од Иранската организација за атомска енергија (ИОАЕ).
Портпаролот на ИОАЕ истакна дека подготвителната работа започнала утринава и почетокот на процесот ќе биде поставен официјално попладне.
Претседателот Махмуд Ахмадинеџад нареди во неделата Иранската организација за атомска енергија да започне да збогатува ураниум за 20 проценти за потребите на истражувачкиот нуклеарен реактор во Техеран. ИОАЕ вчера ја информираше Меѓународната агенција за атомска енергија за таа одлука.
Според Иран, збогатувањето ураниум за 20 проценти се наложува поради блокирањето на преговорите со шесте големи сили за доставување гориво од странство за реакторот за медицински истражувања.
Во исто време Исламската република даде до знаење дека „вратата останува отворена“ за преговори и ги повика петте постојани членки на Советот за безбедност на ОН и Германија да преминат од конфронтација кон соработка.
Објавената одлука од Иран за збогатување ураниум предизвика остра реакција од страна на меѓународната агенција за атомска енергија, особено на шесте големи сили. Тие се сомневаат дека Техеран се обидува да се здобие со нуклеарно оружје под прикритие на нуклеарна програма за цивилни цели.