Москва, 9 февруари (МИА) - Русија е разочарана од одлуката на Иран да збогатува ураниум и предупреди дека овој чекор ја поставува под сомневање искреноста на Техеран во преговорите за неговата нуклеарна програма, соопшти синоќа руското МНР.
Шефот на Советот за безбедност на претседателот на Русија Николај Патрушев изјави дека според него се основани сомневањата на Западот за мирниот карактер на иранската нуклеарна програма.
Тој истакна дека можеби ќе бидат неопходни не само преговори, туку и други средства, за да биде променет односот на Иран. Политичките и дипломатските методи се важни за решавање на прашањето, но се си има граници, рече Патрушев.
Русија може да го поддржи наложувањето меѓународни санкции врз Иран поради тоа што започнал да збогатува ураниум и поради неговото одбивање да соработува со Меѓународната агенција за атомска енергија (МААЕ), изјави синоќа претседателот на Комисијата за надворешни работи на руската Дума Константин Косачев.