Виена, 11 февруари (МИА) - Според доверлив извештај на Меѓународната агенција за атомска енергија (МААЕ) Иран користи минимален дел од своите можности за збогатување ураниум до повисоко ниво, соопштија американските медиуми.
Според документот, што им е покажан на медиумите, во моментов Иран користи само 164 центрифуги за збогатување ураниум. При тоа за преработување до ниво од 20 процента биле одбрани едвај 10 килограми ниско збогатен ураниум.
Иран располага со над 8.000 центрифуги и досега има натрупано резерви од 1.800 килограми ниско збогатен ураниум.
Според истиот извештај на МААЕ, Иран ќе пристапи кон реализација на проектот за збогатување на ураниум до ниво од 20 проценти во следните неколку дена, користејќи дел од каскадата од центрифуги во атомскиот комплекс Натанц.
Иран вчера официјално соопшти дека пристапи кон преработка на ниско збогатен ураниум до повисоко ниво со цел да го произведе неопходното нуклеарно гориво за научно-истражувачкиот реактор во Техеран.