Лондон, 7 април (МИА) - Американскиот дипломат Питер Галбрајт, кој е поранешен висок функционер на ОН во Кабул, го нарече авганистанскиот претседател Хамид Карзаи „ментално нестабилна личност“.
Според „Дејли телеграф“, кој ја пренесува изјавата на Галбрајт, американскиот дипломат рекол дека Карзаи е „нестабилен човек кој уште и се дрогира“, со што уште повеќе ја заостри и онака силно распалена реторика во расправијата меѓу авганистанскиот претседател и Западот.
Како што јави дописникот на МИА од Лондон, изјавата на Галбрајт доаѓа по обвинувањата од претседателот Карзаи за тоа дека западните земји, вклучувајќи ги и САД, се вмешани во кражбата на гласовите за време на тамошните претседателски избори, посочувајќи притоа најмногу на Галбрајт.
Галбрајт, кој пред неколку години беше активен и на Балканот, на обвинувањата од Карзаи реагираше со навреди кон авганистанскиот претседател, тврдејќи дека се однесува „импулсивно, дека е емотивен и склон кон тиради“, како и тоа дека е „наклонет кон консумирање на популарните производи на авганистанскиот извоз“, за што лондонскиот весник вели дека е алузија на авганистанскиот опиум.
Додека престојуваше во Кабул, Галбрајт јавно дојде во судир со првиот човек на мисијата на Обединетите нации во Авганистан, Норвежанецот Кај Ејде, околу текот на изборите и инсистирањето на Американецот да се изврши целосно прегласување, поради наводните фалсификати. На тоа се спротивставија норвешкиот дипломат и повеќемина други западни функционери, кои стравуваа дека одолговлекувањето со изборниот процес може да и наштети на стабилизацијата на земјата. Поради тој судир, во кој ОН застанаа на страната на Ејде, американскиот дипломат поднесе оставка.
“Дејли телеграф“ забележува дека кавгата на Галбрајт со Карзаи и најновите навреди изречени на сметка на претседателот на Авганистан, предизвикуваат односите меѓу Вашингтон и Кабул да се сведат на најниското ниво досега, што ги загрозува САД, кои таму имаат голем број свои војници.
Портпаролот на Карзаи, меѓутоа, за лондонските медиуми објасни дека изјавите и суштината на критиките на претседателот не се прецизно пренесени во западниот печат.