Чикаго, 9 април (МИА) - Генералниот секретар на НАТО Андерс Фог Расмусен ги повика западните земји да соработуваат со претседателот на Авганистан Хамид Карзаи и покрај тоа што обвини некои од нив за учество во изборни измами во неговата земја, пренесоа светските агенции.
-Во целина имаме многу добра соработка со претседателот Карзаи и неговата влада. Тој е човек, со кого можеме и треба да соработуваме, изјави Расмусен во говор во Чикашкиот универзитет.
-Претседателот Карзаи презеде многу големи ангажмани за да го подобри управувањето, вклучувајќи и зацврстување на борбата со корупцијата. Тоа е важно - да се исполнат ветувањата. Очигледно изборниот процес беше проблематичен и не одговараше на западните стандарди, рече Расмусен за минатогодишните претседателски и провинциски избори во Авганистан.
Расмусен уште изјави дека е прерано да се каже какви ќе бидат последиците од немирите во Киргистан, но потенцира дека тие нема да имаат „никакви оперативни последици“ за активностите на НАТО во Авганистан.