Кабул, 10 јуни (МИА) - Силите на НАТО во Авганистан ги обвинија Талибанците за синоќешниот самоубиствен напад за време на свадба во авганистанската провинција Кандахар, при што загинаа најмалку 40 лица, а 77 се ранети.
- Ова бесмислено насилство во момент, кој требаше да биде одбележан со радост и празнување, е демонстрација на слепата и одвратна тактика на Талибанците да ги тероризираат луѓето, се нагласува во соопштението на ИСАФ.
Авганистанските сили претходно соопштија дека според првичните резултатите од истрагата моќната експлозија биле самоубиствен напад.
Претставник на полицијата во Кандахар напомена дека голем број од околу 400-те гости на свадбата, биле поврзани со локалната полиција и додаде дека биле нападнати токму од таа причина.
Талибанците демантираа дека се вмешани во нападот. - Ние осудуваме еден ваков брутален чин. Талибанците водат џихад, за да го ослободат народот од рацете на окупаторите. Како можеме ние да го убиваме?, изјави портпаролот на исламистичкото движење Кари Јусуф Ахмади.
Тој смета дека за нападот е одговорна ИСАФ.
Свеченоста се одржувала во реонот Аргандаб, северно од градот Кандахар. Во авганистанската провинција странските војски долго време водат борба со Талибанците.