Брисел, 11 јуни 2010 (МИА) - Министрите за одбрана на 46-те држави кои учествуваат во мисијата во Авганистан, ветија зголемување на бројот на војници кои ќе вршат обука на авганистанските сили со надеж дека од оваа година ќе почнат со повлекување на контингентите.
Државите од НАТО со нетрпение очекуваат да почнат повлекување на силите од крвавиот конфликт, но се согласни дека тоа може да се случи откако авганистанските сили за безбедност ќе бидат способни сами да водат битки со талибанските бунтовници.
На мисијата на НАТО и недостигаат 450 инструктори.
Министрите усвоија декларација во која го поздравуваат напредокот на авганистанските сили за безбедност и посочуваат дека се ангажирани да обезбедат инструктори за обука за да се зацврсти постигнатото.
Генералниот секретар на НАТО Андрес Фог Расмунсен изјави дека силите на НАТО ќе почнат оваа година да ја предаваат одговорноста за безбедноста на авганистанските сили. Контингентот на ИСАФ е 120.000 војници.