Сиетл, 10 септември 2010 (МИА) - Американските корисници на интернет повеќе време трошат за комуникација на „Фејсбук“ отколку на пребарувачот „Гугл“, покажуваат резултатите на најновото истражување на аналитичката компанија „Комскор“.
Во август американските веб корисници вкупно поминале 41,1 милион минути на „Фејсбук“ што претставува 9,9 отсто од вкупниот број на минути користени на интернет. Додека на „Гугл“ поминале 39,8 милиони минути односно 9,6 проценти од вкупниот број на минути користени на интернет. Во времето поминато на „Гугл“ пресметано е и времето поминато на најпопуларните интернет-страниците „ЈуТјуб“, „Гмејл“ и „Гугл њуз“.
На трето место е „Јаху“, каде корисниците на интернет поминале 37,7 милиони минути или 9,1 отсто од вкупното он-лајн време.
„Фејсбук“ во јули првпат го зазеде првото место од „Гугл“, додека во август минатата година интернет корисниците поминале исто време на двете мрежи.
„Комскор“ својата анализа ја заснова на извештајот на поврзаните групи од два милиони интернет корисници во светот и податоците од серверите на веб-сајтовите, но не е пресметано времето за поставување на фотографиите и за „апдејтување“ на пораките на статусот.