Лос Анџелес, 6 октомври 2010 (МИА) - Милијардерот Доналд Трамп објави дека ја „разгледува сериозно“ можноста да се кандидира на претседателските избори во САД во 2012 година.
За телевизијата Фокс њуз, 64-годишниот магнат изјави дека планира да се кандидира на републиканската листа, а неговата кампања да се залага за обнова на авторитетот на САД пред светот.
Трамп рече дека со присуството во Белата куќа може да внесе „префинетост“ и „здрав разум“.
- Јас сум републиканец, така што ако направам нешто, ќе го направам како републиканец. Говорам сосема сериозно, затоа што не можам да го поднесам тоа што се случува во земјата. Тоа не значи дека навистина ќе го сторам, но сериозно го размислувам, рече Трамп.