Лондон, 6 октомври 2010 (МИА) - Ким Џонг-ун, најмалиот син на севернокорејскиот лидер Ким Џонг-ил и евентуален негов наследник, веројатно има направено пластична операција на лицето, за да личи на својот дедо Ким Ил-сунг, пишува лондонскиот весник „Дејли телеграф“.
Шпекулациите на оваа тема се појавија прво во Јужна Кореја, откако минатата недела Пјонгјанг ги објави првите официјални снимки на Ким Џонг-ун, кој беше унапреден во чин генерал и стана заменик претседател на Националниот комитет за одбрана.
Јужнокорејскиот весник „Дон-а Ирбо“ тврди дека хируршката интервенција има за цел да ја зацврсти позицијата на младиот Ким како следен лидер преку „преобразување во покојниот основач на Северна Кореја“.
Објавените снимки многу се разликуваат од поранешните, младешки, снимки на на Ким младиот, особено во формата на брадата, вели професорот од токискиот универзитет „Васеда“ Тошимицу Шигемура, цитиран од „Дејли телеграф“.