Сеул, 29 ноември 2010 (МИА) - Јужнокорејскиот претседател Ли Мјун-бак го оцени неодамнешниот севернокорејски артилериски напад како „злосторство против човештвото“ и предупреди дека Пјонгјанг скапо ќе плати во случај на нова провокација.
- Не можам да не го изразам својот гнев против бруталноста на режимот на Северна Кореја, изјави Ли Мјун-бак во телевизиското обраќање кон народот во врска со растечката напнатост меѓу двете Кореи.
- Сегашната вооружена провокација драстично се разликува од претходните. За првпат по постигнувањето примирје во Корејската војна е нанесен артилериски напад врз наша територија, рече претседателот.
Во вторникот севернокорејската артилерија истрела 170 гранати врз јужнокорејскиот остров Јонпјон. Деведесет гранати паднаа во морето, а 80 експлодираа на островот и убија двајца маринци и двајца цивили.
Претседателот стана објект на остри критики на медиумите и политичарите за воениот одговор на Сеул, кој се сметаше за недоволно силен, по артилерискиот напад врз Јонпјон.