Њујорк, 18 декември 2010 (МИА) - Генералниот секретар на ОН Бан Ки-мун изјави дека обелоденувањето доверливи документи кои ги објави „Викиликс“, ја искомплицирало меѓународната дипломатија.
- Несреќно е што тие доверливи документи истекоа, рече Бан. - Која и да било мотивацијата, сето тоа ќе ја отежни нормалната и разумната работа, особено во светот на дипломатијата, рече тој.
Генералниот секретар на ОН се споменува во еден од дипломатските дописи кои ги објави „Викиликс“. Тука се наведува дека Стејт департментот побарал од американските претставници во Светската организација и на други места да настојуваат да дојдат до броевите на кредитните картички и мобилни телефони, електронски адреси, лозинки и други доверливи податоци за претставниците на ОН и странските дипломати.
Во дипломатските дописи како една од „метите“ на таквите активности се споменува и Бан Ки-мун.
Генералниот секретар на ОН одби да ја коментира судската постапка против основачот на „Викиликс“ Џулијан Асанж во Велика Британија.