Доха, 15 февруари 2011 (МИА) - Повеќе од 200 либиски интелектуалци го повикаа денеска лидерот на револуцијата Моамер Гадафи да си замине од власт и да обезбеди мирна транзиција во земјата, објави телевизијата „Ал Џезира“.
Професори, адвокати, доктори, инженери, поранешни дипломати и воени лица застанаа зад повикот за „демократски промени, кои треба да бидат извршени на мирен и цивилизиран начин“. Тие побараа од властите да се воздржат од задушување на демонстрациите, кои се закажани за 17 февруари.
- Гадафи и сите членови на неговото семејство треба да им ја предадат власта на народните претставници и да не го спречуваат движењето на Либија на патот кон либерализација и плурализам, како што тоа се случува во други земји по примерот на настаните во Тунис и Египет, се наведува во обраќањето на претставниците на либиската интелигенција.
Според „Ал Џезира“ повикот е поддржан од задграничните опозициски партии Национален фронт за спас, Либиско исламско обединување, движењето „Хулас“, Унија на републиканците за демократија и социјална правда, организации за заштита на човековите права и Лигата на културни дејци и писатели.
Моамер Гадафи се наоѓа на власт во Либија 42 години.