Техеран, 16 февруари 2011 (МИА) - Иранскиот претседател Махмуд Ахмадинеџад изјави дека непријателите кои планирале антивладини протести во Техеран нема да ги постигнат своите намери.
- Очигледно е и јасно дека иранската нација има непријатели бидејќи таа е држава што сака да го постигне својот врв и да ги промени односите меѓу државите во светот, изјави Ахмадинеџад во интервју за државната телевизија.
Ахмадинеџад истакна дека оние кои ги организираа протестите во понеделникот нема да ги постигнат своите цели.
Неколку илјади приврзаници на опозицијата во Иран учествуваа во протестите, со изговор дека на тој начин изразуваат поддршка на народот на Египет и Тунис.
За време на протестите дојде до судир меѓу полицијата и демонстрантите во кои загинаа две лица, а неколку беа повредени меѓу кои и девет припадници на безбедносните сили.