Триполи, 17 февруари 2011 (МИА) - Демонстранти кои протестираат против режимот на Моамер Гадафи излегоа денеска во четири града во Либија. Американски медиуми јавуваат за 14 жртви во протестите на „денот на гневот“.
Според опозициски медиуми имало судири на полицијата со приврзаници на режимот во источниот град Бејда каде ноќеска и рано утрото биле убиени 11 луѓе. Двајца демонстранти се убиени и во градот Зентана и еден во Риџбан, југозападно од Триполи.
Продолжуваат демонстрациите во Бенгази, вториот по големина град во Либија. Телефонските врски со Бенгази се прекинати уште во вторникот кога полицијата со сила растера демонстранти при што беа повредени 38 луѓе.
Стотици приврзаници на либискиот лидер Моамер Гадафи се собраа денеска во Триполи за да не дозволат да се одржи антивладиниот „ден на гневот“.
Хјуман рајтс воч соопшти дека либиските власти привеле 14 луѓе. Нема знаци за антивладини протести во Триполи, јавуваат западни медиуми.
Гадафи вчера изјави дека „револуционерите“ ќе победат без да каже збор за протестите. Според аналитичари, малку е веројатно да се смени власта во Либија.