Каиро, 21 февруари 2011 (МИА) - Демонстранти и полицајци синоќа се судрија во либискиот главен град во обид да воспостават контрола над центарот на Триполи.
Снајперисти пукаа во луѓето од покривите на зградите, а приврзаниците на претседателот Моамер Гадафи отворија оган од автомобили во движење, изјавија очевидци.
Ова најверојатно се најтешките судири во Триполи по крвопролевањата во некои источни либиски градови.
Демонстранти го исполниле Зелениот плоштад во центарот на Триполи, како и другите плоштади во близина, а цивилни полицајци и војници ги нападнале. Судирите продолжија до утринава. има и жртви, но нивниот број се уште не се знае.
Телевизијата „Ал Џезира“, повикувајќи се на очевидец, објави дека антивладините демонстранти денеска изутрина го исполниле плоштадот „Сук ал Гомаа“, кој еден од најголемите во главниот град на Либија.
Во меѓувреме, дописниците на западните медиуми од главниот град на Либија јавија дека чад се издига од зградата на либиската Влада во Триполи, околу која се наоѓаат поголем број пожарникари кои се обидуваат да го изгаснат пожарот.