Триполи, 24 февруари 2011 (МИА) - Либиските сили за безбедност ги нападнаа синоќа учесниците во антивладини протести во третиот по големина на население град во земјата - Мисурата. Има жртви, јавија западните медиуми, повикувајќи се на очевидци.
- Приврзаниците на режимот ги нападнаа невооружените демонстранти со автомати и минофрлачки гранати, изјавил еден од очевидците. Тој споменал за неколку убиени.
Според него, неколку стотини демонстранти после тоа се уште останале во центарот на Мисурата, на 200 километри источно од Триполи и биле опкружени од силите за безбедност.
Третиот по големина либиски град веќе стана на 19 февруари арена на крвави судири меѓу противници на режимот и силите за безбедност.
Противниците на режимот го контролираат вториот по големина либиски град - Бенгази, додека либискиот лидер Моамер Гадафи продолжува да ја држи престолнината Триполи.