Каиро, 25 февруари 2011 (МИА) - Главниот обвинител на Либија Абдул Рахман ал Абар изјави денеска дека поднел оставка и се приклучил кон опозицијата, која се обидува да го собори режимот на лидерот Моамер Гадафи.
- Објавувам со сигурност дека поднесувам оставка од функцијата главен обвинител на Либија и се приклучувам кон волјата на либискиот народ, изразена со револуцијата од 17 февруари, изјави Абар во видеообраќање емитувано преку телевизиите „Ал Арабија“ и „Ал Џазира“.
Тој изјави дека оваа одлука ја донел во знак на протест против крвопролевањата, кои ги предизвикува режимот на Гадафи.
Либиската армија и полицијата во источниот град Абиџан соопштија дека ги напуштиле касарните и се приклучиле кон опозицијата.
- Ние од полициските сили објавуваме дека целосно се приклучуваме кон народот во мирната револуција од 17 февруари. Објавуваме дека ќе ги жртвуваме животите за тој регион и ќе се ставиме во негова служба со крајна цел слобода за Либија, изјави за телевизијата „Ал Џазира“, полицискиот капетан Хафиз Абдул Рахим.
Полковникот од вооружените сили Шваиб Ибрахим ал Акуки изјави дека армијата исто така се приклучува кон револуцијата.
Режимот на Гадафи постави „ѕид“ од тенкови околу Триполи, со цел да оневозможи опозициските сили да влезат во градот.