Токио, 24 март 2011 (МИА) - Бројот на загинати и исчезнати во земјотресот и цунамито во Јапонија, надмина 27.000, се наведува во најновиот извештај на јапонската полиција.
Се стравува, меѓутоа, дека конечниот биланс на жртвите може да биде и поголем, со оглед на фактот дека џиновскиот цунами, со височина од 10 метри, го опустоши источниот брег на Хоншу и со земјата срамни цели градови.
Според најновите податоци со кои располага јапонската полиција, потврдено е дека во оваа природна катастрофа животот го загубија 9.811 лица, додека 17.541 официјално се водат за исчезнати, што вкупно претставува 27.352 лица.
Повредени се вкупно 2.779 лица, додека стотици илјади луѓе остана без домови и се наоѓаат во центрите за евакуација, наведуваат агенциите.
Земјотресот беше најголемата природна катастрофа во Јапонија, по земјотресот во Канто, во кој во 1923 година загинаа повеќе од 142.000 лица.