Триполи, 31 март 2011 (МИА) - Либиските бунтовнички сили започнаа денеска да се враќаат во градот Брега откако вчера го напуштија пред пристигнувањето на силите лојални на либискиот водач Моамер Гадафи, јави телевизијата Ал Арабија.
Силите на Гадафи вчера брзо напредуваа кон исток, кон упориштето на опозицијата Бенгази, откако бунтовниците го напуштија и градот Аџдабија, североисточно од Брега, на околу 150 километри од Бенгази.
Во меѓу време, претставници на опозицијата во јужниот град Куфра соопштија дека војници од елитната либиска бригада „Хамис“ им се приклучиле на бунтовничките сили.
Бригадата која се смета за една од најдобро обучените и военоспособни делови на либиската армија, го носи името на својот командант и син на лидерот Моамер Гадафи, Хамис Гадафи.