Токио, 4 април 2011 (МИА) - Јапонската Влада и порача денеска на компанијата ТЕПКО, која управува со нуклеарната централа „Фукушима“, што побрзо да го запре истекувањето на радиоактивни материи во океанот, додека екипите во нуклеарката настојуваат со користење на контраст да го утврдат изворот на истекување на радиоактивна вода.
Главниот секретар на Кабинетот Јукио Едано предупреди дека акумулирањето на радиоактивни материи поради нивно истекување, кое продолжува иако се вложуваат напори да запре, „ќе има големо влијание на океанот“.
Официјални претставници вчера предупредија дека стабилизирањето на нуклеарната криза, предизвикана од земјотресот и цунамито на 11 март, би можело да потрае неколку месеци.
Откако за време на викендот пропаднаа напорите истекувањето на радиоактивна вода преку пукнатината на Вториот реактор да се спречи со бетонирање, инженерите во „Фукушима“ денеска во тунелот кој води од овој реактор поставуваат бела супстанца во прав за да утврдат дали на ова место се наоѓа извор од кој истекува контаминирана вода.