Токио, 6 април 2011 (МИА) - По серија неуспешни обиди, истекувањето на радиоактивната вода во океанот од хаварисаната јапонска нуклеарна централа „Фукушима 1“ денеска беше спречено, соопшти компанијата оператор “Токио електрик пауер“ (ТЕПКО).
Работниците од ТЕПКО минатата недела открија дека од 20-сантиметарска пукнатина во бетонска шахта на вториот реактор постојано истекува вода со високо ниво на радиоактивност. Тие безуспешно се обидуваа да ја бетонираат пукнатината.
Сепак денеска успешно е запрено истекувањето, истурајќи 1.500 литри хемикалии во пукнатината.
Нивото на радијација на водата, која истекуваше во океанот, беше петпати повисоко од дозволеното.
Во меѓувреме, јапонските власти планираат да користат мали американски безпилотни летала за редовно мерење на радиоактивноста над уништените реактори на нукеларката.
Авионите од овој тип имаат систем за вертикално полетување и можат да висат во воздухот над определени објекти. Сега се разгледува можноста на леталото да биде монтирана специјална апаратура за мерење на радијацијата и за фотографски снимки. Се очекува користењето на овие летала во реонот на „Фукушима 1“ да започне уште следната недела.
Претходно за извршувањето на овие операции се користеа хеликоптери на јапонската армија и голем американски безпилотен авион. Поради премногу високото ниво на радиоактивност во реонот на „Фукушима 1“ мерењето и снимките се правеа од големо растојание.