Триполи, 11 јули 2011 (МИА) - Синот на либискиот лидер Моамер Гадафи, Сеиф ал Ислам тврди дека режимот во Триполи и француската Влада водат преговори.
- Вистина е дека ние преговараме со Франција, а не со бунтовниците, изјави Сеиф ал Ислам Гадафи во интервју за алжирскиот весник „Ел Хабар“.
Според него, францускиот претседател Никола Саркози му изјавил на пратеник на Гадафи дека Франција го создала либискиот бунтовнички Преоден национален совет и дека без нејзина поддршка, пари и оружје тој никогаш немал да постои.
Од француска страна, според синот на Гадафи, истакнале дека откако ќе биде постигнат договор со режимот на неговиот татко, ќе ги принудат бунтовниците да се согласат на прекин на огнот.
Интервјуто е објавено неколку часа откако францускиот министер за одбрана Жерар Лонге го повика Преодниот национален совет да започне преговори со Гадафи.
Либиските бунтовници одбиваат да преговараат со режимот, додека Гадафи не се повлече од власт, услов кој не е оспорен од НАТО. Според медиумите, позицијата на Лонге изразува зголемено нетрпение од развојот на конфликтот во Либија. Франција е еден од „јастребите“ во западната коалиција, која се обидува да го присили Гадафи да се повлече од власт.
Претходно, американскиот Стејт департмент издаде соопштение кое не содржи најава за компромис. Либискиот народ е тој, кој ќе одлучи како ќе биде спроведена оваа транзиција, но ние остануваме цврсти во својот став дека Гадафи не може да остане на власт, се наведува во соопштението.
Различните ставови на двете водечки сили во западната коалиција укажува на притисокот на кој е изложен НАТО по повеќе од три месеци воена интервенција во Либија, без поголем успех.