Њујорк, 1 август 2011 (МИА) - Германија и Италија побараа одржување вонредна седница на Советот за безбедност на Обединетите нации на која би се расправало за ситуацијата во Сирија.
Претставник на германската мисија при ОН изрази надеж дека седницата ќе се одржи уште денеска. Индија денеска од Германија го презема едномесечното претседавање со Советот за безбедност на ОН.
Италијанскиот министер за надворешни работи Франко Фратини, исто така побара Советот за безбедност итно да се состане и остро ги осуди нападите на сириската армија врз противниците на режимот во сирискиот град Хама.
- Бараме Советот за безбедност на ОН итно да се состане, со цел да земе цврст став, изјави Фратини за телевизијата ТГ2, истакнувајќи дека предложил и средба на амбасадорите во Дамаск на земјите од ЕУ.
Според податоците на организациите за заштита на човековите права меѓу 80 и 140 цивили се убиени вчера од страна на армијата за време на немирите во градот Хама, кој режимот на Башар Асад се обидува да ги смири неколку седмици.