Каиро, 20 септември 2011 (МИА) - Паднатиот либиски лидер Моамер Гадафи изјави дека системот на управување, кој е основан во Либија се заснова на волјата на народот и не може да се отстрани.
Во аудио порака емитувана од сириската телевизија „Ар Раи“, Гадафи, исто така нагласи дека авионите на НАТО нема да можат да ги продолжат операциите во Либија.
- Политичкиот систем во Либија е систем, основан врз власта на народот и е невозможно тој систем да биде отстранет, изјави Гадафи. Бомбардирањата на НАТО авионите нема да продолжат, нагласи тој.
Според соборениот либиски лидер настаните кои се случуваат во моментот во неговата земја се „маскарада“. Гадафи ги повика Либијците да не веруваат дека е случена промена на режимот.
- Тоа што се случува во Либија е една маскарада и тоа само благодарение на НАТО бомбардирањата, кои нема да продолжат вечно. Не се радувајте и не мислете дека е соборен еден режим и е воспоставен друг со помош на напади од воздух и море, предупреди Гадафи.