Тунис, 22 септември 2011 (МИА) - Муса Ибрахим, портпарол на поранешниот либиски лидер Моамер Гадафи, денеска изјави дека 151 лице се убиени во градот Сирт за време на воздушните напади на НАТО и престрелките од страна на Преодниот национален совет (ПНС).
Тој истакна дека главната болница во градот престанала да работи, бидејќи биле потрошени резервите од лекови и нема електрична енергија.
Неговите тврдења не можат да бидат потврдени, бидејќи родниот град на Гадафи е отцепен од светот и опколен од три страни од силите на ПНС. Нема коментар ниту од силите на НАТО.
- од вчера до утринава 151 цивил беа убиени во своите домови, откако ракети „град“ и други експлозиви паднаа врз нивните куќи, објасни Ибрахим.
Претставници на Советот денеска соопштија дека откриле магацин со хемиско оружје во оазата Џофра, на 700 километри јужно од Триполи, објави британскиот весник „Гардијан“.
За да ги обнови односите со Западот, владата на Моамер Гадафи во 2003 година објави дека ја прекинува националната програма за создавање на оружје за масовно уништување.