Триполи, 26 октомври 2011 (МИА) - Синот на соборениот либиски лидер Моамер Гадафи, Сеиф ал Ислам и неговиот зет и поранешен шеф на разузнавачката служба Абдула ал Сенуси предлагаат да му се предадат на Меѓународниот кривичен суд во Хаг, соопшти претставникот на Преодниот национален совет на Либија, Абдел Маџид Млегта.
Според Млегта, до ваквите сознанија е дојдено од разузнавачки извори, кои тврдат дека Сеиф ал Ислам Гадафи и Сенуси се обидуваат да постигнат договор за нивно предавање на Судот.
Млегта нагласи дека Гадафи помладиот и Сенуси се решиле на ваквиот потег сметајќи дека за нив не е безбедно да останат во Либија или да заминат во Алжир или Нигер.
- Тие сметаат дека за нив не е безбедно да останат таму каде што се сега или да отидат на друго место, рече Млегта, додавајќи дека Нигер им барал многу пари за да им овозможи да престојуваат таму.
Меѓународниот кривичен суд уште пред неколку месеци издаде меѓународни потерници против Моамер и Сеиф ал Ислам Гадафи и против Сенуси, под обвинение за воени злосторства.
Засега не се знае точно каде се наоѓа Сеиф ал Ислам Гадафи, но се претпоставува дека тој е во јужниот дел на Либија во пограничните региони со Нигер.