Дамаск, 28 март 2012 (МИА) - Сирија ќе отфрли каква било иницијатива од средбата на врвот на Арапската лига што ќе се одржи утре во Багдад, изјави портпарол на сириското МНР.
- Откако членството на Сирија времено е прекинато во Арапската лига, Сирија разговара со членки на таа организација по принцип на билатерални разговори. Сирија ќе отфрли поради тоа, каква било иницијатива од Арапската лига, независно на какво ниво е предложена таа, изјави Џихад Макдеси, портпарол на Министерството.
Според ОН, Дамаск прифати план од шест точки на пратеникот на ОН и Арапската лига Кофи Анан за прекин на кризата во Сирија.
Пред почетокот на средбата на врвот во Багдад министрите за надворешни работи од Арапската лига се собраа за изготвување нацрт-резолуција која ќе биде предложена утре на арапските лидери. Резолуцијата ќе се однесува во голем дел на ситуацијата во Сирија. Се очекува во неа да биде упатен повик за национален дијалог меѓу Дамаск и сириската опозиција. Сириското членство во Арапската лига беше времено прекинато во ноември минатата година.