Лион, 20 јули 2012 (МИА) - Меѓународната полициска организација Интерпол одлучи да испрати во Бугарија своја екипа од соработници, кои ќе помогнат во истрагата за антиизраелскиот напад во Бургас, кој беше извршен во средата при што загинаа петмина Израелци, еден Бугарин и напаѓачот-самоубиец, а повеќе од 30 лица беа повредени.
Интерпол, чие седиште се наоѓа во Лион, соопшти дека испраќањето на своја екипа е по барање на земја-членка на организацијата во случај на кризна ситуација.
Генералниот секретар на Интерпол Роналд К. Ноубол вчера изјави, во врска со информациите дека наводниот самоубиец носел фалсификувани документи, дека „од суштинско значење е да се увиди дали некој од овие документи фигурираат во базата на податоци „Изгубени или украдени патни документи“ на Интерпол“.
- Потребно е исто така да се дознае дали напаѓачот ги користел овие документи за време на својот престој во Бугарија, додаде шефот на Интерпол.
Според бугарските власти напаѓачот-самоубиец патувал со фалсификувана возачка дозвола, издадена во американската држава Мичиген.