Досега непозната група „База на џихадот“ денеска презеде одговорност за нападот врз автобусот со израелски туристи во бугарскиот приморски град Бургас во средата, при што загинаа шест лица.
- Еден од нашите припадници со помошта на Алах успеа да разнесе автобус полн со еврејски туристи кои ја осквернавија светата земја, се наведува во соопштението доставено до повеќе западни медиуми
Групата покрај преземањето одговорност за нападот во Бургас, најавува и извршување на нови акции.
- Месецот Рамазан е месец на светата војна и на смртта во името на Алах. Тоа е месец за борба против непријателите на Алах и неговиот пророк - Евреите и нивните американски поддржувачи... Светата војна не е ограничена на конкретна арена и ние ќе се бориме со Евреите и Американците се додека не ја напуштат исламската земја, се наведува во соопштението.
Израелските медиуми, кои го пренесуваат соопштението на „База на џихадот“ или на арапски „Каида ал Џихад“, оценуваат дека групата по се изгледа е поврзана со движењето Голем џихад, кое пак тесно соработува со Ал Каида