Вашингтон, 21 мај 2013 (МИА) - Најмалку 91 лице загинаа во големо торнадо што погоди јужното предградие на Оклахома Сити, Мур, јави Си-Ен-Ен.
Цели квартови на Мур, кое има население од околу 55.000 жители, се срамнети со земјата.
Над 230 лица се повредени, меѓу кои и 45 деца. Најмалку десетмина од повредените се во критична состојба.
Бурата директно погоди основно училиште во Мур, однесувајќи го покривот и уривајќи ѕидови. Неколку деца биле извадени живи од под урнатините.
Брзината на ветровите што го следеле торнадото достигнала 320 километри на час. Ширината на торнадото била 1,6 километри. Таква брзина и обем достигнуваат само помалку од еден процент од торнадата. Најсилните ветрови, регистрирани на Земјата, се оние што го следат торнадото, при што апсолутен рекорд е 486 километри на час.
Американскиот претседател Барак Обама ја прогласи Оклахома за зона на голема природна катастрофа. Цел на оваа мерка, како што соопшти Белата куќе, е федералната влада да може да укаже помош на тешко настраданите од торнадото.
Обама телефонски разговарал и со гувернерот на сојузната држава Оклахома, Мери Фалон, и и ја изразил својата загриженост. Демократот Обама ја информирал републиканката Фалон дека на својата администрација и наредил на настраданите да им ја пружи сета неопходна помош.