Индиското истражно тело Директорат за спроведување наскоро ќе започне со распит на бизнисменот Субрата Рој кој се соочува со ново сомнение дека учествувал во активности за перење пари, јавуваат индиските медиуми, јави Фактор.
Истрагата на овој директорат се темели на претходните испитувања спроведени од индиското регулаторно тело СЕБИ, кое имало сознанија дека групацијата „Сахара“ била вклучена во вакви илегални активности.
– Врз основа на сознанија на СЕБИ и нашата првична истрага, се сомневаме во перење на пари во голем обем. Под директна истрага се околу три милијарди долари, изјавил извор од Директоратот кој побарал да остане анонимен.
Истражниот тим проверува дали групацијата „Сахара“ била вклучена во перење пари и дали сомнителните три милијарди долари биле употребени за да се креира богатството и имотот на оваа компанија во Индија и во странство.
Според медиумите, истрагата верува дека дури 90 отсто од ситните инвеститори заведени во портфолиото на „Сахара“ всушност се измислени лица, кои преку шемата биле искористени за да се исперат парите.
Македонската Влада неодамна ја активираше банкарската гаранција понудена за инвестицијата во агрокомбинатот „Џумајлија“, а од „Сахара“ преку соопштение најавија дека и покрај ова не се откажуваат од нивните инвестициски планови за Македонија.