Вашингтон, 4 април 2015 (МИА) - Постигнувањето на политички договор со Иран за неговата нуклеарна програма без учество на Русија би било невозможно, изјави портпаролката на американскиот Стејт департмент Мари Харф, јави ТАСС.
Харф на прашање на новинар на ТАСС дали преговорите со Иран ќе завршат со успех без поддршка на Русија, одговори дека тоа не е можно, дека Русија е дел од групата на пет постојани земји членки на СБ на ОН плус Германија и клучен учесник во преговорите.
- Уверена сум дека меѓународната шесторка ќе остане единствена во целите и пристапот. Но, во следните три месеци претстои уште многу работа, направивме добар чекор, но треба да се постигне договор и за технички детали, истакна Харф.