Компанијата Microsoft соопшти дека последната верзија на Windows во Европската унија ќе се испорачува без Internet Explorer.
Софтверскиот гигант реши своето работење да го усогласи со европското законодавство, откако ЕУ неколку пати го казни Microsoft за монополското однесување на пазарот. Жалби за испораката на Explorer во Windows оперативните системи имаа и Opera, Mozilla и Google.
Пред последното соопштение, од компанијата велеа дека во новиот Windows ќе стават опција за отстранување на Internet Explorer 8, а веројатно произведувачите на компјутери претходно ќе инсталираат IE 8 или некој друг пребарувач на интернет страници на уредите кои ги испорачуваат.
Во меѓувреме, според последните статистики, третата верзија на Mozilla Firefox зазема 35 отсто од пазарот и со тоа го престигна Internet Explorer 7 со кој сурфаат 34 отсто од интернет корисниците.